ദീര്ഘകാല സാമ്പത്തിക ലക്ഷ്യങ്ങള് യഥാസമയം കൈവരിക്കുവാന് ഏറ്റവും അനുയോജ്യമായ നിക്ഷേപ മാര്ഗമാണ് മ്യൂച്വല് ഫണ്ടുകള്. റിസ്ക് എടുക്കുവാനുള്ള ശേഷി ശരിയായ വിധം മനസ്സിലാക്കി അതിനനുയോജ്യമായതും മികച്ച പ്രകടനം നടത്തിവരുന്നതുമായ സ്കീമുകള് ഉള്ക്കൊള്ളിച്ച് സന്തുലിതമായ ഒരു പോര്ട്ഫോളിയോ വികസിപ്പിച്ചെടുക്കുകയാണ് ഓരോ നിക്ഷേപകനും ചെയ്യേണ്ടത്.
മാതൃകാ പോര്ട്ഫോളിയോ എന്നതു കൊണ്ട് അര്ഥമാക്കുന്നത് പ്രധാനപ്പെട്ട എല്ലാ മ്യൂച്വല് ഫണ്ട് വിഭാഗങ്ങളിലും ഉള്പ്പെട്ട സ്കീമുകളില് നിക്ഷേപിച്ച് ബൃഹത്തായ ഒരു പോര്ട്ഫോളിയോ നിര്മിക്കലല്ല, മറിച്ച് മാനേജ് ചെയ്യാന് പാകത്തില് തങ്ങളുടെ റിസ്ക് പ്രൊഫൈലുമായി ചേര്ന്നു പോകുന്ന അഞ്ചോ ആറോ സ്കീമുകള് ഉള്പ്പെടുത്തി രൂപപ്പെടുത്തിയെടുക്കുന്ന ഒരു ഫോളിയോ എന്നുള്ളതാണ്.
നിക്ഷേപത്തിനായുള്ള സ്കീമുകള് തിരഞ്ഞെടുക്കുമ്പോഴും ഒരു മാതൃകാ പോര്ട്ഫോളിയോ രൂപപ്പെടുത്തിയെടുക്കുമ്പോഴും ശ്രദ്ധിക്കേണ്ട കാര്യങ്ങള് എന്തെല്ലാമാണെന്ന് നോക്കാം.
1 മുന്കാലങ്ങളിലെ പ്രകടനം അടിസ്ഥാനപ്പെടുത്തി മാത്രം മ്യൂച്വല് ഫണ്ട് സ്കീമുകള് തിരഞ്ഞെടുക്കാതിരിക്കുക. അനുകൂലവും പ്രതികൂലവുമായ പല കാര്യങ്ങളും വിപണിയില് സംഭവിച്ചേക്കാം. ഫണ്ട് മാനേജ്മെന്റുമായി ബന്ധപ്പെട്ട് പല മാറ്റങ്ങള് സ്കീമിലും സംഭവിക്കാം. അതുകൊണ്ടു തന്നെ പഴയകാല പ്രകടനം എല്ലാ മ്യൂച്വല് ഫണ്ട് സ്കീമുകളിലും ആവര്ത്തിക്കണമെന്നില്ല.
2 മ്യൂച്വല് ഫണ്ടുകളിലെ കാറ്റഗറികള് അനുസരിച്ച് മാത്രം പ്രകടനം താരതമ്യം ചെയ്യുക. ഉദാഹരണത്തിന് ഒരു ലാര്ജ് ക്യാപ്പ് ഫണ്ടിന്റെ പ്രകടനം മറ്റൊരു ലാര്ജ് ക്യാപ്പ് ഫണ്ടിന്റെ പ്രകടനവുമായാണ് തുലനം ചെയ്യേണ്ടത്. മറിച്ച് മറ്റൊരു മിഡ്ക്യാപ്പ് ഫണ്ടിന്റെയോ സ്മോള്ക്യാപ്പ് ഫണ്ടിന്റെയോ പ്രകടനവുമായിട്ടല്ല. ഈ മൂന്നു വിഭാഗങ്ങളും നിക്ഷേപത്തിനായി തിരഞ്ഞെടുക്കുന്ന ഓഹരികള് തീര്ത്തും വ്യത്യസ്ത സ്വഭാവം പുലര്ത്തുന്നവയായതിനാലാണിത്.
3 ഒരേ വിഭാഗത്തില് പെടുന്നതോ ഒരു സെക്ടറിനെ മാത്രം പ്രതിനിധാനം ചെയ്യുന്നതോ ആയ സ്കീമുകള് മാത്രം നിക്ഷേപത്തിനായി തിരഞ്ഞെടുക്കുന്നത് ഉചിതമല്ല. ഉദാഹരണത്തിന് 2 ലക്ഷം രൂപ ഒറ്റത്തവണയായി നിക്ഷേപിക്കാനുദ്ദേശിക്കുന്ന വ്യക്തി തന്റെ റിസ്ക് എടുക്കാനുള്ള ശേഷി വിലയിരുത്താതെ മുഴുവന് തുകയും ലാര്ജ് ക്യാപ്പിലോ മിഡ് ക്യാപ്പിലോ അതുമല്ലെങ്കില് ഇന്ഫ്രാസ്ട്രക്ചര്, ഫാര്മ, ഐ.ടി. പോലുള്ള ഒരൊറ്റ സെക്ടറില് മാത്രം നിക്ഷേപിച്ചു വരുന്ന സ്കീമുകളിലോ മാത്രമായി ഒതുക്കാതിരിക്കുക.
4 സ്കീമുകളുടെ ശരിയായ വൈവിധ്യവല്ക്കരണം പോര്ട്ട്ഫോളിയോയുടെ കെട്ടുറപ്പിന് നല്ലതാണ്. അതേസമയം അമിതമായി ഡൈവേഴ്സിഫൈ ചെയ്യുന്നത് ദോഷം ഉണ്ടാക്കുകയും ചെയ്യും. അനാവശ്യമായി സ്കീമുകളുടെ എണ്ണം വര്ധിപ്പിക്കുന്നതും ഒരേ സ്വഭാവമുള്ള സെക്ടറുകളെ കൂടുതലായി ഉള്പ്പെടുത്തുന്നതും മറ്റും പോര്ട്ട്ഫോളിയോയുടെ പ്രകടനം യാഥാര്ഥ്യബോധത്തോടെ വിലയിരുത്തുന്നതിനും തടസ്സമായേക്കാം.
5 കാറ്റഗറികളുടെ പ്രകടനം മൊത്തം വിലയിരുത്തുമ്പോള് ചില വിഭാഗങ്ങള് കൂടുതല് റിട്ടേണ് നല്കിയതായി കാണാം. ഉദാഹരണത്തിന് മിഡ്, സ്മോള് ക്യാപ്പ് വിഭാഗങ്ങള് ലാര്ജ് ക്യാപ്പിനെ അപേക്ഷിച്ച് കൂടുതല് റിട്ടേണ് നല്കി വരാറുണ്ട്. റിസ്ക് കൂടിയതിനാലാണ് റിട്ടേണ് കൂടുതല് വന്നതെന്ന് ചില നിക്ഷേപകരെങ്കിലും മനസ്സിലാക്കാറില്ല. റിസ്ക് കൂടുതല് എടുക്കാന് സന്നദ്ധരാകുന്നവര്ക്ക് മിഡ് ക്യാപ്പുകളും സ്മോള് ക്യാപ്പുകളും തീര്ച്ചയായും പോര്ട്ട്ഫോളിയോയില് ഉള്പ്പെടുത്താം. പക്ഷെ വിപണി താഴോട്ടു വരുന്ന അവസ്ഥയിലും തങ്ങളുടെ നിക്ഷേപം നിലനിര്ത്തിപ്പോരാനുള്ള ധൈര്യവും ക്ഷമയും നിക്ഷേപകര്ക്കുണ്ടായിരിക്കണമെന്ന് മാത്രം.
6 മ്യൂച്വല് ഫണ്ടുകളില് ഫണ്ട് മാനേജര് തന്നെയാണ് താരം. നിക്ഷേപിക്കാനുദ്ദേശിക്കുന്ന സ്കീമുകളുടെ ഫണ്ട് മാനേജ് ചെയ്യുന്നത് ആരെല്ലാമാണെന്നും മുന്കാലങ്ങളില് അവരുടെ പ്രകടനം എപ്രകാരമായിരുന്നു എന്നതിനെക്കുറിച്ചുമെല്ലാം പഠിക്കാന് ശ്രമിക്കുക. ഇന്ത്യന് മ്യൂച്വല് ഫണ്ട് ഇന്ഡസ്ട്രിയിലെ പ്രഗല്ഭരായ ഫണ്ട് മാനേജര്മാരുടെ ഒരു ലിസ്റ്റ് തയ്യാറാക്കുന്നത് കൗതുകകരവും അതുപോലെ ഉപകാരപ്രദവുമായിരിക്കും.
7 പുതുതായി പുറത്തിറങ്ങുന്ന എന്എഫ്ഒ അഥവാ ന്യൂ ഫണ്ട് ഓഫറുകളില് മാത്രം നിക്ഷേപിച്ചു വരുന്നവരെ കണ്ടിട്ടുണ്ട്. എന്.എ.വി. 10 രൂപയില് തന്നെ ലഭിക്കുമെന്നതാണ് ഇവരുടെ വാദമെങ്കിലും പ്രായോഗിക തലത്തില് എന്.എഫ്.ഒ. മാത്രം നിക്ഷേപത്തിനായി തിരഞ്ഞെടുക്കുന്നത് ബുദ്ധിയല്ല. മികച്ച രീതിയില് പ്രകടനം കാഴ്ചവെക്കുന്ന നൂറുകണക്കിന് ഫണ്ടുകള് നിലവിലുണ്ടെന്നും നിക്ഷേപം പിന്വലിക്കുമ്പോള് ലഭിക്കുന്ന ആദായത്തിനാണ് കൂടുതല് ഊന്നല് കൊടുക്കേണ്ടതെന്നും മനസ്സിലാക്കുക.
8 മുകളില് കൊടുത്ത നിര്ദേശം താഴ്ന്ന എന്.എ.വിയില് കൂടുതല് യൂണിറ്റുകള് ലഭിക്കുമെന്ന ഒറ്റ കാരണം പറഞ്ഞ് നിക്ഷേപം നടത്തുന്നവര്ക്കും ബാധകമാണ്. വര്ഷങ്ങളായി വിപണിയിലുള്ള ഫണ്ട് ആണെങ്കിലും താഴ്ന്ന എന്.എ.വി. സൂചിപ്പിക്കുന്നത് അതിന്റെ മോശം പ്രകടനത്തെയാണ്. കാലങ്ങളായി മികച്ച പ്രകടനം കാഴ്ച വെക്കുന്നതിനാലാണ് ചില ഫണ്ടുകളുടെ എന്.എ.വി. ഉയരങ്ങളിലെത്തിയതെന്നും ഈയവസരത്തില് ഓര്ക്കുമല്ലോ. ചുരുക്കത്തില് എന്.എ.വി. കുറവാണ് എന്ന കാര്യം പറഞ്ഞ് മോശം ഫണ്ടുകള് തിരഞ്ഞെടുക്കുന്ന രീതി ഉപേക്ഷിക്കുക.
9 നിശ്ചിത ഇടവേളകളില് പോര്ട്ട്ഫോളിയോയുടെ പ്രകടനം സ്കീം തിരിച്ച് വിലയിരുത്തേണ്ടതും അത്യാവശ്യമാണ്. വര്ഷത്തിലൊരിക്കലെങ്കിലും ഇത്തരത്തില് നടത്തുന്ന റിവ്യൂ പോര്ട്ട്ഫോളിയോയുടെ ശരിയായ വളര്ച്ച ഉറപ്പുവരുത്താന് നിക്ഷേപകരെ സഹായിക്കും.
ജീവന്കുമാര് കെ.സി.
(ഹെഡ്, ഇന്വെസ്റ്റ്മെന്റ് അഡൈ്വസറി സര്വീസസ്, ജിയോജിത്)
#ഫണ്ട്ഫോക്കസ്
