കുട്ടികളുടെ വിദ്യാഭ്യാസത്തിനുള്ള തുക കണ്ടെത്തുക എന്നത് ഇന്ന് മാതാപിതാക്കളെ അലട്ടുന്ന ഒരു വലിയ പ്രശ്‌നമാണ്. വിദ്യാഭ്യാസ ചെലവുകള്‍ ഉയര്‍ന്നു വരുന്നതോടൊപ്പം ഉന്നത വിദ്യാഭ്യാസത്തിന്റെ രീതികളില്‍ തന്നെ വലിയ വ്യത്യാസം വന്നു എന്നതും ചെലവ് വര്‍ധിക്കാന്‍ ഇടയാക്കിയിട്ടുണ്ട്. നേരത്തെ ഉന്നത വിദ്യാഭ്യാസം എന്നത് ഉന്നത നിലവാരമുള്ള കോളെജുകള്‍, മെഡിസിന്‍ എന്‍ജിനീയറിങ്ങ് എന്നിവയില്‍ മാത്രം ഒതുങ്ങി നിന്നിരുന്നുവെങ്കില്‍ ഇന്ന് പല മേഖലകൡ വൈദഗ്ധ്യം നേടാനാവുന്ന തരത്തിലുള്ള വിവിധ തരം കോഴ്‌സുകള്‍ ലഭ്യമാണ്. കോഴ്‌സുകളുടെ വൈവിധ്യത്തിനനുസരിച്ച് ചെലവും ഉയര്‍ന്നു വരുന്നുണ്ട്. വിദേശ വിദ്യാഭ്യാസമാണ് മറ്റൊരു ട്രെന്‍ഡ്. വിദേശ രാജ്യങ്ങളില്‍ പോയി വിദ്യാഭ്യാസം നേടുന്ന വിദ്യാര്‍ഥികളുടെ എണ്ണം വര്‍ധിച്ചുകൊണ്ടിരിക്കുന്നു. വിദേശ വിദ്യാഭ്യാസത്തിന് വന്‍തുകയാണ് ചെലവാക്കേണ്ടി വരിക. അങ്ങനെ മക്കളുടെ ഉന്നത വിദ്യാഭ്യാസത്തിനായി ഭാരിച്ച ചെലവാണ് ഇന്ന് രക്ഷിതാക്കള്‍ വഹിക്കേണ്ടി വരുന്നത്. ശരിയായ പ്ലാനിങ്ങില്ലാതെ കടക്കെണിയില്‍ പെട്ടുപോകുന്ന കുടുംബങ്ങള്‍ നിരവധിയാണ്.
അതുകൊണ്ടു തന്നെ നേരത്തെ ഈ ലക്ഷ്യത്തിന് വേണ്ട തുക സമാഹരിക്കാന്‍ നിക്ഷേപം നേരത്തെ തുടങ്ങുകയാണ് വേണ്ടത്. നാലാം വയസ്സില്‍ എല്‍കെജിയില്‍ കുട്ടിയെ ചേര്‍ക്കുമ്പോള്‍ തന്നെ സ്‌കൂള്‍ ഫീസ് അടക്കുന്നതു പോലെ ഒരു നിശ്ചിത തുക വിദ്യാഭ്യാസത്തിനായും നീക്കി വയ്ക്കുക വഴി 17-ാം വയസ്സില്‍ ഉന്നത വിദ്യാഭ്യാസത്തിനുള്ള തുക സമാഹരിക്കാനാകും. 13 വര്‍ഷത്തോളം ഉള്ളതുകൊണ്ടു തന്നെ ഓഹരിയധിഷ്ഠിത മ്യൂച്വല്‍ ഫണ്ടില്‍ നിശ്ചിത തുക വീതം നിക്ഷേപിക്കുന്ന രീതിയില്‍ എസ്‌ഐപി തുടങ്ങാം. റിസ്‌ക് തീരെ എടുക്കാന്‍ താല്‍പര്യമില്ലാത്തവര്‍ക്ക് ഡെബ്റ്റ് മ്യൂച്വല്‍ ഫണ്ടുകള്‍, റിക്കറിങ്ങ് ഡെപ്പോസിറ്റ്, പിപിഎഫ്, പെണ്‍കുട്ടികളുടെ പേരിലാണെങ്കില്‍ സുകന്യ സമൃദ്ധി യോജന എന്നീ നിക്ഷേപങ്ങള്‍ തിരഞ്ഞെടുക്കാം. നഷ്ട സാധ്യത കുറവായതുകൊണ്ട് വളര്‍ച്ചാ നിരക്കും കുറവായിരിക്കുമെന്നതാണ് ഇത്തരം സ്‌കീമുകളുടെ പോരായ്മ. ദീര്‍ഘ കാലയളവിലുള്ള നിക്ഷേപമാണെങ്കില്‍ ഓഹരിയധിഷ്ഠിത നിക്ഷേപങ്ങള്‍ ആകും കൂടുതല്‍ അനുയോജ്യം. ഇവയ്ക്ക് പണപ്പെരുപ്പത്തെ അതിജീവിക്കുന്ന വളര്‍ച്ചാ നിരക്ക് നല്‍കാന്‍ കഴിവുണ്ട്. മുഴുവന്‍ തുകയ്ക്കും സമാഹരിക്കാന്‍ സാധിക്കാത്ത സാഹചര്യം ഉണ്ടായാല്‍ തിരിച്ചടക്കാനുള്ള കഴിവിനനുസരിച്ച് വിദ്യാഭ്യാസ വായ്പയെ ആശ്രയിക്കാം. ബാധ്യത ഇല്ലാതാക്കുകതയോ കുറയ്ക്കുകയോ ആണ് ഉന്നത വിദ്യാഭ്യാസ ലക്ഷ്യത്തിനായി പണം സമാഹരിക്കുന്നതുകൊണ്ട് ഉദ്ദേശിക്കുന്നത്.
